Azərbaycan Dövlət Neft və Sənaye Universiteti

Azərbaycan Dövlət Neft və Sənaye Universiteti (ADNSU, ASOIU) Azərbaycanın ən qədim və aparıcı texniki ali təhsil müəssisələrindən biridir. Mühəndis təmayüllü ilk universitet olaraq təsis edilən ADNSU neft və qaz resurslarının insan kapitalına transformasiyası üzrə ixtisaslaşıb. Bir əsrlik tarixi ərzində universitetin məzunları fundamental texnologiyalar tətbiq etməklə və yeni sənaye sahələri istismara verməklə respublikada sənaye inqilabına böyük töhfə vermişlər. Universitetin tərkibində geoloji-kəşfiyyat, qaz-neft-mədən, kimya texnologiyası, neft mexanikası, energetika, İT və idarəetmə, iqtisadiyyat və menecment fakültələri fəaliyyət göstərir. ADNSU beynəlxalq əməkdaşlığa böyük diqqət yetirir, Vorvik Universiteti ilə ikili diplom proqramı həyata keçirir, həmçinin Fransa-Azərbaycan Universiteti (UFAZ) ilə sıx əməkdaşlıq edir. Universitetdə tədqiqat mərkəzləri, Rəqəmsal Energetika Mərkəzi, Kitabxana İnformasiya Mərkəzi, Start-up və Texnologiya Transfer Ofisi, həmçinin Karyera Mərkəzi fəaliyyət göstərir. ADNSU-nun missiyası təhsil, tədqiqat və innovasiyalar vasitəsilə Azərbaycan xalqına və bütövlükdə insanlığa xidmət etmək, sənaye üçün yüksək ixtisaslı mühəndis kadrları hazırlamaqdır.