Rəqəmsal Məktəb

Rəqəmsal Məktəb - Azərbaycan Respublikası Elm və Təhsil Nazirliyi tərəfindən hazırlanmış rəqəmsal təhsil platformasıdır. Platforma şagird, valideyn, müəllim və direktorları vahid rəqəmsal mühitdə öyrənmə, tədris, ünsiyyət və əməkdaşlıq üçün birləşdirir. Şagirdlər hazırlanmış tapşırıq və test tapşırıqlarını yerinə yetirərək keçilmiş mövzuları möhkəmləndirə, müəllimlərə sual verə, video dərslər və elektron dərsliklərə baxa, həmçinin özünü qiymətləndirə bilər. Valideynlər övladlarının təlim nəticələrini, həftəlik dərs cədvəlini görə və məktəb rəhbərliyi ilə əks əlaqə qura bilirlər. Müəllimlər tədris etdiyi siniflər üzrə qiymətlər, şagird siyahıları, dərs cədvəli və elektron jurnallara nəzarət edərək sənədləşmə prosesini rəqəmsallaşdırırlar. Direktorlar isə tədris prosesini bir məkandan idarə edir, şagird, müəllim və valideynlər haqqında ətraflı məlumata, statistik göstəricilərə və ani hesabatlara çıxış əldə edir, valideyn müraciətlərinə cavab verirlər. Platformada həmçinin iqlim dəyişikliyi, davamlı inkişaf hədəfləri, STEAM yanaşması və digər mövzularda faydalı tədris videoları yerləşdirilib. Bu, Azərbaycanda məktəb təhsilinin rəqəmsallaşdırılması üçün əhəmiyyətli bir vasitədir.